فكرة من كل مصرى من أجل مصر

أولا وقبل أى كلام احب اقول لكم جميعاً وحشتونى موت وأنا اسف على الغيبة الطويلة لكن انا بجد كنت واخد قررارى انى ابعد ومكتبش تانى لكن معرفتش أعمل ده وحبى ليكم وللمدونة رجعنى تانى لكن يمكن انا اتغيرت شوية أصل الزمن والمواقف بتعلم وتغير حجات كتيرفى الأنسان .

أما ثانياً أنا فكرت كتير فى موضوع جديد نتكلم فيه ويمكن الأجواء اليومين دول كلها وطنية وأنتماء وحب لبلدنا مصر بعد الأنجاز اللى عملوه منتخبنا العظيم وعلشان كده أنا قررت ارجع تانى وأتكلم معاكم عن مصر أم الدنيا وطنا وحبنا



بس أنا نفسى الكلام يكون مختلف مش عاوز اتكلم فى شعارات ونرددها وبس ولكن أنا نفسى يكون لنا دور .... دور نحاول من خلاله نخلى بلدنا أحسن ونحقق اللى بنحلم بيه والدور ده ببساطه هو أن كل واحد مننا يفكر فى حاجة ممكن نعملها وبيها نخلى مصر أحسن وعلشان منكبرش الموضوع طبعاً كلنا أكيد فى حاجات مش عجبانا بتحصل كل يوم ومشاكل كتير وكل اللى بنعملوا أننا نفضل نقول لا ده كدا غلط واللى بيحصل ده ظلم واحنا اتظلمنا ومنعملش حاجة غير النقد والتشكيك فى كل حاجة ونقعد ندور عل السلبيات ونعد فى أخطاء ولكن أنا معتقدش أن فى أى حد مننا حاول يسأل نفسه مرة أيه الحل نعمل أيه..........؟

لكن كل اللى بنعمله ننتقد ونعدد مشاكل تمام زى نقاد الكورة ممكن تلاقى ناقد عمره ما لعب كورة بس قاعد ينتقد فى اللعيبة ويقولك لا الكورة دى مكنش لازم تتلعب كده واللاعب ده غلط فى اللعبه دى ولو نزل هو الملعب يمكن ميعرفش يعمل اى حاجة حتى اللى كان بينتقده علشان كده أنا نفسى كل واحد فينا يفكر فى مشكلة بتواجه مصر من وجهة نظرة بس كمان يفكر فى حل للمشكلة ويشاركنى فى " حملة فكرة من كل مصرى لأجل مصر " . تخيلوا لو أننا مثلا قبل أى ماتش كورة وزعنا على ال 80 ألف متفرج كل واحد ورقة وقلنا لكل واحد أكتب لنا فكرة لحاجة من وجهة نظرك لو أتغيرت أو لو اتعملت تخلى بلدنا أحسن متخيلين اللى هيحصل هيكون معانا 80 ألف فكرة نقدر بيها نخلى مصر أجمل وأحلى علشان كدة نفسى تشاركونى بأفكاركم وكل واحد أكيد عنده حجات مش عجباة فى شغله فى دراسته فى تعاملاته اليومية ياريت تشاركونى ومتنسوش أننا هدفنا مش بس عرض المشكلة لكن كمان عرض الحل مستنى أفكاركم مقترحاتكم ويا رب الموضوع يعجبكم



شاركونى حملة فكرة من كل مصرى من أجل مصر


وخلينا كلنا يكون شعارنا معاً من أجل مصر



هناك 38 تعليقًا:

همس الاحساس يقول...

وووووووووووووووووووووى وووووووووى


انا اول تعليق


تؤتؤتؤ مش متصورة

استنى افتح عينى تانى


برده انا اول تعليق



يمكن الله اعلم


صدفه

همس الاحساس يقول...

اولا احب اقولك انى مبسوطه
لانك رجعت فى قرارك انك هتسيب التدون

ثانيا الفكرة حلوة اوى
بسى المشكله مين هيسمع ومين هيحل المشاكل

بسى انا اهم مشكله فى رائى
هى التعليم
لانه الاهمال فى المواد الدراسيه
والدراسه كان سبب مشاكل كتير
اما الحل لسه بفكككر
الموضوع بده تفكير كتير لان المشكله صعبه

م/ محمد صالح يقول...

اولا أنا متشكر على كلامك بس احب أقولك أن انتى خالفتى الاتفاق احنا قولنا اننا عاوزين حلول مش بس مشاكل وبعدين لو اللى بيعانى من المشكلة مش عارف لها حل أزاى بقى نستنى حل من حد مكن يكون مش حاسس بيها خالص وبعدين نرجع نقول لا ده غلط وده حل مش نافع احنا لازم يكون لنا رأى اما عن مين اللى هيسمعنا فده شئ بسيط وخليكى متفائلة انت مثلا لو عندك حلول منطقية لمشاكل وفعلا حلولك ممكن تتحقق ممكن توصليها لعميد كليتك او لوكيل من وكلاء الكلية وسعتها على الاقل يبقى بنعمل اللى علينا وصدقينى انا جربت الموضوع ده فى بعض الامور فى الكليه صحيح فى الاول كان فيه رفض بس مع الاصرار توصلنا لحلول للمشاكل اللى بنعانى منها .

جايدا العزيزي يقول...

بس بقى يا بشمهندس


فكرة جريئه بل رائعه


اولا المشاكل عندنا كتير


والسلبيات فاقت الايجابيات


اولا الاهمال



ويشمل كل الوزارات التعليم الصحه


الى اخرة


المحسوبيه والرشوة


وياعينى على قانون الطوارئ


والشعب حقيقى طبقه بالحرف



مش لانه شعب ملتزم ومتحضر لا والف لا


انما لانه خاف واختار قانون خليك فى حالك احسن


كمان عندك زيادة النسل


والبطاله


اعد تانى


والحلول بسيطه


لزيادة النسل تحديد النسل


وللبطاله العمل


مش لازم بالشهادة ممكن مشروع خاص صغير


واحد دكتور يفتح كشك سجاير



انا اعرف محامى شغال سواق تاكسى


مش عيب بس ده ظلم


بعد ما تعب وزاكر يشتغل سواق



اما مشكله السكن


عندنا استصلاح الاراضى الجديدة


واحد ما يعرفش اى حاجه عن الزراعه


مطلوب منه يزرع ويروى ويحصد


اما الرشوة ممكن نقول لا


واراهنك ان مصالحنا لن تنظر


والتعليم غيرنا الوزير وجه وزير تانى



ولغايه النهاردة ولا حس ولا خبر


ووزير الصحه بيعمل ايه


روح شوف المستشفيات الحكوميه


عدم نظافه واهمال


حلينا مشكله رغيف الخبز ازاى



بالمظاهرات والشجب والغضب


لان رغيف العيش عنصر اساسى فى حياة الاسرة البسيطه


يعنى الاسرة البسيطه كل همها رغيف العيش


ما بتفكرش فى تعليم ولا صحه ولا تعرف


يعنى ايه محسوبيه



ولو عملنا مظاهرات


تفتكر هناك من يسمع لنا


عارف بدأت مصر تستورد غاز من


الدول الاخرى


لان الغاز الاساسى لا يكفى


طب ازاى وهى بتصدرة لاسرائيل


ما اصل احنا شعب الكرم


النيل رواة والخير جواة


وعادى ممكن ياخد على قفاة


لى عودة


لانك فتحت بركان بداخلى



كنت قد قررت الا افتحه مرة اخرى


تحياتى

م/ محمد صالح يقول...

جايدا العزازى
شرفتينى فى اول زيارة
بس للآسف هو ده اللى كنت خايف منه التشاؤم
انا آسف لأنى فى اول مشاركة ليكى اختلف معاكى فى الرأى
انا شايف ان كل شئ ممكن يتعدل ويبقى زى ما بنتمناه بجد لكن ده مش هيحصل طول ما احنا محبطين لازم نعمل حاجة نفكر حضرتك برضو عددتى مشاكل وطرحتى حلول فى صورة هزلية يمكن هو ده الواقع لكن لازم نغيره حضرتك لو لاحظتى الاتجاه الاقتصادى فى مصر فى الفترة الاخيرة تلاقيق متجه نحو اقتصاد السوق الحر مما يعنى انتهاء زمن الرشوة والوسطة لأن بمنتهى البساطة انا لو صاحب شركة خاصة لا يمكن اقبل انى اشغل واحد عندى غير مؤهل لمجرد انه عنده وسطة لأنى ببساطة عاوز اكسب يعنى ببساطة الاكفء هو اللى يشتغل
وحضرتك لو لاحظتى عدد اللى بتخرجوا من كليات الهندسة مثلا تلاقيهم آلاف ولو حسبتى اللى يستاهل انه سكون مهندس منهم واللى ممكن يشتغل وبنجح تلاقيهم لا يتعدوا عشرات
وده سببه ان كل واحد عاوز ابنه يكون مهندس او دكتور بغض النظر عن هو ابنه عاوز ايه طيب هو ممكن ينجح ولا لأ كل ده مش مهم المهم ان ابنه يكون دكتور وده طبعا بينتج عنه اللى بنسمع عنه كل يوم اطباء غير مؤهلين مهندسين غير مؤهلين وطبعا نتيجه ده كوارث كتيرة
يعنى الخلاصة دى ثقافة شعب ولازم تتغير وده لا يمكن يحصل إلا من خلالك ومن خلالى ومن خلال توسيع دائرة الوعى وان الاصلح هو اللى هينجح وسعتها لو الدائرة دى وسعت اكيد هيكون منها اللى هيوصل ويكون صاحب قرار ويحقق لنا كل اللى بنحلم بيه وده لأنه مؤمن بية فعلا مش لأنها شعارات بيرددها علشان منصب او كرسى
ونفس الفكر والاسلوب بينطبق على كل الامور طيب ايه اللى هيحصل لو ان كل واحد دخل مكان وشاف حاجة غلط مسكتش اكيد فى حاجة هتتغير بس لازم الاول دائرة التغير الفكرى تكبر ومن خلالها ممكن كل شئ يتغير لأنها هتنتج ناس مؤمنة فعلا باللى بتقوله

جايدا العزيزي يقول...

بس يا محمد انا مش ضليعه فى السياسه


لكنى اتابع واهتم بقضايا بلدى


احاول ان ان اجد الحلول وان انهض بفكرى اولا لكى انشئ اولادى


على حريه الرائ

كل كلامك معقول ومنطقى


انا تعليم متوسط

كان حلمى انى اكمل


كنت من المتفوقين بل من الاوائل


لكن لظروف الاسرة حرمت من تحقيق امنيتى


وقررت ان اعتمد على نفسى

وان ابحث عن المواهب المدفونه بداخلى


قرأت حتى ارتويت

كنت ابحث بين اقربائى المتعلمين


عن كل الكتب فى جميع المجالات


قانون طب هندسه شريعه

اقتصاد ادب سياسه الى اخرة

وكنت اشترى بكل راتبى كتب

ان اغلى شئ امتله فى منزلى مكتبتى


وحينما تزوجت ويسر الله حالى


كانت مكتبتى هى اغلى ما امتله

وصممت ان اعلم الاطفال فى شارعنا


منهم الان الظابط والمهندس

وكان ابنائى بينهم

ابنى الان فى كليه سياحه وفنادق

كانت تلك رغبته


لم ايأس ولم اتشأم كما قلت


ولكنى حينما اكتب اكتب بحدود

وحينما احلم كان لحلمى حدود


وتلك قضيه اخرى افتحها


لما دائما نهمل دور المرأة


ونضع امامها الاف الحواجز


هل لاننا مجتمع شرقى


الرجل فيه هو سيد الموقف


وجودى هنا معناة انى صامدة

احاول بكل استماته اثبات وجودى


ولكن الى متى سأظل صامدة


الى متى ساظل سجينه احرفى


لى عودة


تحياتى

الشاعر الفنان أحمد فتحى فؤاد يقول...

اولا شكرا لك لتشريفك مدونتي وأهلا بك دايما
ثانيا موضوعك رائع وإسمح لي بتعليق بسيط
الأخت جايدا جزاها الله كل خير ضغطت بقوة علي الجراح وفتحتها بكل عنف وصدق
انا هاقولك رأيي من واقع تجربتي في دولة عربية شقيقه بجد وما زلت مقيم بها
إسمع يا اخي وما تقول متشائم
اولا الصحة: عندنا لو دخلت مستشفي حكومي هتلاقيها عباره عن صندوق زبالة كبير وأسف في التعبير بس ده الواقع وطبعا ناهيك عن الإهمال وسوء المعاملة والتجاهل و الوسايط و و و و ... أما في الدولة الشقيقه اللي برضه عربية لو دخلت مستشفي حكومي هتحس إنك في مستشفي 5 نجوم وطبعا خدمه وأهتمام و رعاية ولا في الأحلام
وانا جربت الإثنين
الحل بمنتهي البساطة هو الضرب بإيد من حديد علي كل مرتشي وبيروقراطي ومتخاذل حتي لو الوزير

ثانيا: الشرطة: عندنا في بلدنا حدث ولا حرج عن الظلم والعنف والواسطة وغيره وغيره
أقولك بلاش الظلم والعنف
تعالي روح طلع رخصة قياده وشوف الوسايط والمحسوبيات اللي تديك رخصة وانت مش بتعرف حتي تسوق وشوف الناس البسطاء اللي ماعندهم واسطه ولا فلوس يدفعوها للرشوة شوف إزاي بيلفوا السبع لفات في تجميع أوراق وبرضه دفع المعلوم وبعدين يسقطوا رغم إنهم فعلا بيسوقوا كويس
وتعالي تاني شوف الدولة الشقيقه هتلاقي ببساطة إن لا أحد فوق القانون وكل واحد بياخد حقه تالت ومتلت سواء في شكوي أو قضية أو رخصه و ناهيك عن حسن المعاملة
والحل برضه ببساطه زي الحل الأول
وهكذا وغيره وعيره وغيره
ربنا يسترها عليك وعلينا ولا يحوجنا لأي خدمات
أسف طولت
شكرا لك

م/ محمد صالح يقول...

الاخت العزيزة جايدا
والاخ العزيز احمد فتحى اولا نورتونى
واتمنى ان سظل الاختلاف فى الراى لايفسد للود قضية
لنل ثانيا فأنا مازلت على يقين ان نهوض أى امة يأتى اولا من شعبها لذا لابد أن نتغير نحن اولا حتى نستطيع انا نغير ما حولنا وانا اكرر ثانية فكرة تغير لغة فالنسبة لكى اختى جايدا فأنا احيكى من كل قلبى على رحاتك الناجحة فى الحياة واتمنى ان تكون مثلا يحتزى به
واما عن الاخ العزيز احمد فؤاد
اريد ان أسألك سؤال واحد فى الول العربية التى تتحدث عنها هل وجدوا انفسهم بين يوم وليلة هكذا متقدمين منظمين كما تصفهم ان ان هناك سر فإن كان هناك سر فلتعلم ان هذا ما ابحث عنه وهو معرفة السر ومحاولة نقله لنا
اخى العزيز لو ان كلا منا ظل يتكلم بلغة اللا أمل إذا فلندفن رؤسنا فى التراب مثل النعام ولنرضى بما نحن عله ولا نطلب اى تغير ام اننا جميعا تعودنا ان يأتينا كل شئ لنستعملة ولم نتعود ابدا السعى وراء الاشياء الصين اخى العزيز انظر الى تقدمها وما وصلت اليه واسئل نفسك عن السبب وانظر الى شعبها فبل ان تنظر الى حكومتها انظر الى سلوك الافراد فى الشوارع الى نظافة المستشفيات واسئل نفسك عن الفرق سوف تجد انه فى المقام الاوول فرق ثقافة افراد وهذا ما نريدة نريد ان ننتقل من ثقافة المتبعين الى ثقافة المريدين ان نفعل ما نريد ما نقتنع به وان نحافظ على بلدنا
هل تعتقد ان المستشفيات التى تشكوى من عدم نظافتها عندما بنيت كانت بهذا الوء ام انها استخدمت بشكل خاطئ كلها اسئلة تحتاج منك الى اجوبة
اما الاهم من كل هذا هو الحلول التى هى الاساس فأنا اعلم وكلكم تعلمون ان هناك مشاكل كثيرة ولا ما لا نعلمه هو الحلول الواقعية وهى التى نبحث عنها

حياه بلا عنوان يقول...

السلام عليكم ورحمه الله وبركاته
نورت من تانى يا محمد التدوين
المهم هدخل على طول فى التعليق انا شبفه ان البوست جميل قوى ويستاهل انه يتنشر عند الجميع بس عوزه اقولك حاجه ان مهما تدعو للنشر واننا ننشر الرئى او المشكله او حلها عمرنا ماهنقدر نوصلهاللشخص اللى ممكن نوصلها احنا هنا بنقول وبندى الرئى مش اكتر محدش شايف ولا حد سامع المشاكل كتير والحلول بسيطه دى اكبر مشكله تقدر تقولى مشكله البطاله ليها حل مشكله السكن مشكله المستشفيات مشكله التعليم تقدر تقولى بعد ما بيتكلمو وبعد اللى بيتنشر بيحصل حاجه جديده للاسف القرار بيكون هوه هوه مفيش اى حاجه بتتعمل علشان حاجه وحده تتصلح مفيش نظام كله بيكون حاجه وحده وسطه عندك وسطه تقدر تحل لنفسك بس مش لغيرك كمان اكتر من كده مفيش ومتقولش ان ده تشائم زى ما قولت لى جايدا العزيزي و الشاعر الفنان أحمد فتحى فؤاد دى حقيقه كلنا عرفنا مهما ننشر عمر النشر ماهيوصل لى اى حاجه للاسف انا بحي اننا بنكلم وبنكتب لنفسنا وبس وحتى لو حد شاف ولا هيتقال هووووش ولا كئنك سمعت ولا شوفت وعادى جدا للاسف ده اللى احنا فيه بس الحمدلله احنا احسن من غرنا مش نقدر نقول اكتر من كده
تحياتى

م/ محمد صالح يقول...

اولا بجد كنت وحشانى جدا يا حياة والحمد الله انك رجعتى تعلقى تانى
ثانيا انا نفسى يا جماعة يكون عندنا شوية امل ولازم تعرفوا " إن الله لا يغير ما بقوم حتى يغيروا انفسهم "
شوفى الغرض من الحملة هو انى عاوز اوسع دائرة الامل يعنى مثلا انتى نفسك سكون فى تغير وانا كمان بس كل واحد فينا حاسس ان هو بس اللى بيسعى للتغير ده ودى عملية صعبة جدا لكن لو كلنا فكرنا مع بعض وكان فكرنا واحد وقدرنا ننشر الفكر الايجابى ده اكيد الدائرة هتوسع كمان وكمان ويطلع منها اللى يقدر يوصل افكارنا ويحقق لنا احلامنا ارجو من كل اللى بيشاركوا معنا انهم يطرحوا حلولهم يمكن يكون واحد من بنا فى يوم من الايام فى موضع المسؤلية وسعتها يكون عندوا حلول كتير
وكمان مين قال ان كل المسؤلين مبيسمعوش ومبيدوروش على حلول
يعنى عندك مثلا د / وزير التربية والتعليم الجديد
تعتقدى انه هيستمر كتير انا اعتقد لاء
وده بمنهى البساطه انه هيواجه ثقافة صعبة التغير يعنى لو خلى امتحانات الثانوية العامة تفرز فعلا من يستحق دخول الجامعات ودخول كليات القدمة سوف يصطدم بشكاوى الهالى وسوف يوصف بالسفاح الذى قضى على اما الطلبة مع انه لا بفعل إلى الصواب فسنويا تخرج الجامعات الآلاف من الطلبة ولكن من تعلم منه فعلا ومن يتحق ان يعمل بشهادته التى حصل عليها لا يتعدوا العشرات وذلك لأنهم لم يكونوا يستحقوا دخول هذم الكليات من البداية وهذا ليس عيب فيهم وانما ذلك لأن الله سبحانه وتعالى اعطى كلا منا موهبه وجعله مميز فى شئ ما لكن المشكلة ان الجميع يبحث عن شئ واحد ان يصبح ابه دكتورا مثلا رغم عنه ورغم عن رغباته لذلك فالمشكلة كبيرة وتحتاج الى طرح جديد واعادة النظر بها والى تغير ثقافة التفكير نفسها
واريد ان اذكرك ثانية ان اى تغير واى نهضة ل تأتى إلا من خلال الشعوب فلا يجب ان نستسلم ونقبل الوضع كما هو وننتظر النمقذ ما نفعل دائما فلنعمل للتغير ولنبدأ بأنفسنا
تحياتى لكى واتمنى ان يدوم الود والاحترام

yasmina يقول...

هااااااااى
ازى حضرتك يا باشمهندس

ليه كدة بس هتبعد كدة مرة واحدة بجد بلاش وماحدش يكون حواليه ناس ميلة اوى كدة واصدقاء بجد ويسيبهم
وحقيقى عالم التدوين دة اكتر من رائع حسيت انى بجد بيه بخرج للدنيا وبعيش بيه بجد وبستفاد اكيد منه كتيييير

اما بقى على الحمله انا فكرت كتيييير اوى بصراحة بس هنكتب ايه ولا ايه انا عديتهم قبل كدة بس مش فاكرة عددهم بس اهمهم واللى بتشملهم هى
الامانة وكمان اننا نحط ربنا دايما فى قلوبنا وعقولنا وانه شايفنا
لو كل واحد ادى شغلة بكل بالمنطق دة بجد البلد هيتحل فيها مشاكل كتييير دة لو ماكانش كلها

البوست عجبنى كتيييييييير اوى احيى حضرتك عليه
لاننا فعلا محتاجين وقفة زى دى
لان التغيير هيبدا مننا احنا مش من حد تانى

تحياتى دايما لحضرتك وبجد البوست راائع
واكتر من رائع

م/ محمد صالح يقول...

ياسمينا
منورانى جدا
وكلامك جميل جدا وهو ده الكلام المنطقى فعلا التغير لازم يبدأ مننا احنا قبل اى حد

اتمنى زياراتك تكرر وبجد اسعدنى جدا تعليقك

rovy يقول...

السلام عليكم .. الفكره جميله خصوصا لما تكون من شاب فى سنك بتعطينا أمل أن بكره ان شاء الله أحلى ..
فكرتى ببساطه هى أبدأ بنفسك فى كل شىء .. يعنى لو قدرنا ننشر ثقافة أبدأ بنفسك كل مشاكلنا حتتحل أو على الأقل معظمها .. لو ربينا أولادنا على أن لا نرمى مخلفات فى الشارع و أن ده شىء عيب و غير متحضر و يخجل أكيد حيكبروا على كده و لو كل واحد عامل الناس زى ما يحب أن يعامل حترجع الأخلاق الحميده تانى و النفس الطيبه السمحة اللى تاهت من المصريين .. حاجات كثير ثانيه زى الرشاوى اللى مع الأسف أنتشرت بحجة الفقر لو رجعنا تانى كل واحد يحاسب نفسه قبل ما يدفع رشوه لأحد و يقول انا كده بأشترك فى معصيه و ذنب كبير و النخوه اللى أفتقدناها لما الناس تشوف حد بيثتغيث و تقول أنا مالى لو قال ممكن أكون أنا أو غيرى فى الموقف ده و أتحرك و ساعد المستغيث و الشباب اللى بيعاكس البنات بحجة أن لبسهم بيستفزونا يا أخى لو حصل و سافرت بلاد الاجانب و شفت البنات بلبسها الغربى المثير فى الشوارع حتفضحنا بقى !!الرجوله أنك تتعود تكون راجل و متضايقش أى بنت حتى لو كان لبسها خليع زى ما بتقول فهى اللى شايلة وزرها .. و غيره و غيره صدقنى فى النهايه حنرجع لنقطة البدايه أبدأ بنفسك و أتحرك فى دائرتك لنشر هذه الثقافه و بالتالى تتسع الدائره الى أن تشملنا جميعا ..
شكرا لفكرتك المتميزه و أعتذر للاطاله
تحياتى

د.آيه يقول...

بسم الله الرحمن الرحيم
أولا أهلا بعودتك يا باشمهندس .. و حمدلله على السلامة .. و شكرالزيارتك ..
هو فعلا في مشاكل كتير أوى في بلدنا .. بس أنا زيك متفائلة و مش بحب أبقي قاتلة الأحلام ..
بس أغلب بل كل المشاكل اللي بنعانى منها أكبر سبب ليها هو الناس نفسهم .. إنعدام الضمير و الأخلاق .. و عدم مراقبة الله فى اللي بيعملوه إبتداءا من تهريب الدقيق من المخابز و عدم الضمير لبعض المدرسين والدروس ..
يبأه الحل إيه؟؟؟؟؟؟؟؟؟
ممكن نعمل لافتات مثلا أو الناس اللي بتعرف تكتب شعر يأثر في الناس اللي معندهاش صمير و يكون سهل .. و نحطه على صور مناسبة .. آيات قرآن .. و كده
أنا مش عارفه بس لازم الناس اللي معندهاش ضمير تتغير من جوه ..و كل واحد يبدأ بنفسه..

أصلي مش هينفع أقول مثلا نروح للناس دى في أماكن شغلها تفتيش يعنى لإن ده مش من اختصاصنا .. و حتى لو قلت نبلغ بنبلغ .. و القضية بتحفظ .. فممكن الحملة تبقي زى أ.عمرو خالد ..
معظمها بتكون ع الأخلاق ..
ممكن الإبتكار و الإبداع و الناس اللي عندها مشاريع نفسها تحققها و ندور لهم على مدعمين و ممولين ..


إن شاء الله هرجع تانى لإنى بتكلم من غير ترتيب شويه
تحياتي

Tears يقول...

طبعا كلامك جميل بس من غير ما اعرف انت اكيد شاب صغير...لان الحماس ده كان عندنا كلنا زمان ايام ما كنا شباب

شوف يا ابنى...لو عايز تكلم بجد لازم تفهم ان اللى بتقوله كويس لكن لا نملك امكانية او آليه تنفيذه الا فى أمور بسيطة جدا و لن تدوم

لو فيه حاجة الشباب عايز يعملها بجد عشان مستقبله و مستقبل اولاده يبقى لازم يعمل دولة

ايوه دولة بمعنى الدولة المحترمة ذات الحياه النيابية السليمة و سيادة القانون و النظام

فالمشكلة مش فينا لان المصرى لما بيسافر بره بيتفوق جدا و بيلتزم بالقانون...مافيش مصرى بيرمى ورقة فى الارض فى اوروبا و لا بيتحرش او يعاكس اى ست حتى لو شبه عاريه و بتفانى فى شغله و بيتفوق و الامثلة كثيرة جدا جدا و انا لفيت و شوفت بعينى

يبقى المشكلة فى مين؟

فى النظام...انها منظومة كاملة من الفساد و الافساد

البلد بقالها تلاتين سنه بتنهب و تهدر ثرواتها و يساء استغلال مواردها

بيختاروا عمدا و مع سبق الاصرار و الترصد اسوا مسئول و الوزير الفاسد هو بس اللى بيقعد سنين اما لو عنده ضمير و لا الناس حاباه يتشال فورا

و نفس الشىء للمحافظين...عبد السلام المحجوب محافظ الاسكندرية كان بيشتغل بجد و عنده ضمير...راح فين؟ خد شلوط لفوق...طيب قعد قد الجوسقى اللى كان ناهبها؟ ابدا و لا ربع المدة حتى

فيه مجلد اكتب فيه أمثلة عن الوزراء؟

الاعلام بيغيب الناس عن عمد و الاحزاب السياسية محجوبة عن التعامل مع الشارع و سايبين الناس لجماعات دينية سياسية تاكل دماغهم و تغرقهم فى توافهة الامور المهم يبعدوا عن التفكير فى السياسة و الكراسى و يقفوا عقولهم عشان ما يوصلوش لحقيقة ان السمكة تفسد من رأسها!

مين اللى بيصدر غاز مصر لاسرائيل بثمن اقل من سعرة العالمى يعنى بيدعمها من جيب المواطن المصرى؟ و ليه اصلا يصدرة و كل الخبرا بيؤكدوا ان خلال سنوات سينفذ الاحتياطى المصرى و ح نضطر نستورده

مين اللى جاب وزير سمم الشعب بمبيدات مسرطنه و لغاية دلوقتى سايبه فى نادى الجزيرة يتشمس؟

مين اللى بيصرف ملايين عشان يعمل كوبرى يوصل لمارينا و يوفر تلاتين كيلو بينما ربع المبالغ دى لو اتصرف فى القرى و الصعيد الناس ح تلاقى تشرب ميه نظيفة؟

مين اللى كرم ابراهيم سليمان و هو فاسد بشكل مفضوح؟

مين اللى بيحارب كل اصوات المعارضة و بيشوه صورتهم و يلفقلهم قضايا و يخلى الشرطة تضرب الشعب و القضاه الشرفاء؟

مين اللى خلى البلد طاردة للشباب و افقدهم الانتماء و خلاهم بيرموا نفسهم فى البحر و يموتوا فى العبارات؟

اقول كمان و لا فهمت كلامى؟

ربنا يوفقك

أميرة الأحلام يقول...

سعدت جدا بمروري بمدونتك يا بشمهندس
وعلى فكره انا خريجه هندسه الزقازيق
وحلوه فكره البوست ده اوى بجد
بلدنا محتاجه كده فعلا بس لما نقول ونكتب عن مشاكلها الاهم من اننا نقول عليها اننا نعرف فعلا نحلها
معلش انا مش هعرف اعلق دلوقتى واشاركك الحمله دى لان بقالي اسبوع مسافره بس انا حبيت اعلق وابدى اعجابي بمدونتك
وان شاء الله لما ارجع خلال اليومين الجايين هعلق تانى وانشر كمان الحمله عندى زى ما طلبت
معلش اعذرني على تاخيري في الرد
شكرا ليك
مع خالص تحياتى

م/ محمد صالح يقول...

rovy
بشكرك جدا على مرورك واتمنى ان يدوم التواصل وبجد كلامك ده هو اللى بدور عليه وفعلا ثقافة ابدأ بنفسك هى مفتاح كل الحلول ويارب كل اللى بيشاركنا يقرأ تعليقك ويبدأ بنفسه اولاً

م/ محمد صالح يقول...

د. آية
اسعدنى جدا تعليقك واتمنى ان يدوم التواصل وافكارك جميلة وكفاية حماسك للموضوع هو ده فعلا اللى بندور عليه ومنتظر عودتك
دومتى فى رعاية الله

م/ محمد صالح يقول...

tears
كلامك منطقى جدا بس فيه نقطة احب تشاركينى فيها هو الناس اللى بتحكمنا واللى انتى بتنقدى تصرفتها وتفاعلها مع مشاكلنا الناس دى جية من فين اكيد مش مستوردنها من بره علشان تعذبنا دى جاية من وسطنا يعنى مصرين يمتلوكون ثقافة الفكر المصرى ولو طلعوا برة اكيد هيتغيروا تمام زى الشباب اللى بتقولى عليهم لما بيتلعوا بره بيلتزموا بالقوانين ومبرموش اى شئ فى الشوارع طيب ليه بيعملوا العكس في بلدهم انها الثقافة المصرية التى يجب ان تتغير ثقافة الفهلوة والنصب واللى بنعتبرة شطارة والتحايل على القانون اللى بنعتبره فهلوه صدقينى لو اتغيرنا احنا من جونا لازم هيجى اليوم ويكون من بينا اشخاص هما اللى بيحكموا ويتحكموا فى الامور وسعتها هنحقق كل اللى بنحلم بيه
وبعدين صدقينى فى خطوات ايجابية كتير بتخدها الدولة لكن احنا عبننا على السلبيات بس
واوعى تفتكرى انى راضى كل الرضى عن الوضع الحالى بس انا شايف طاقة نور ابتدت تتفتح ولازم نستغلها كفاية مثلا الحرية الموجوده دلوقتى فى الصحف والاعلام وخير دليل حرينتا فى الكلام دلوقتى يعنى اعتقد لو ان الكلام ده من زمان شوية مكنش حد هيقدر يعترض ولا يتكلم وكنا هنعيش راضين وساكتين طيب ليه منستغلش الوضع اللى احنا فيةه وندور على نقط اتفاق بينا نقدر ننطلق منها الى الافضل
وعلى العموم نورتينى ورأيك كان مهم جدا بالنسبة لى لأن ده اكيد رأى كتير من اللى بيتابوعنا
اتمنى منك ان يدوم التواصل حتى يسفر نقاشنا عن نتيجة نقدر نفيد بيها وطننا

م/ محمد صالح يقول...

أمير الاحلام
نورتبنى يا بشمهندسة
والحمد الله على سلامتك وعوتك بالسلامة
رأيك فعلا مهم وانا مستنى عودتك
ومتشكر على حرصك على التعليق وابداء رأيك

أبو مصعب يقول...

ايوه من اجل مصر مش من اجل مصر ليه يا خويا هو احنا صغيرين

م/ محمد صالح يقول...

ابو مصعب
اهلا بيك صديق عزيز يكمن انا مفهمتش قصدقك لكن كل اللى احب اقولهولك ان مصر دى بلدنا كلنا سواء صغيرين او كبار

د/عرفه يقول...

جميلة الفكرة يا باش مهندس


طبعا

Yes we can


بس محتاجين شوية إيجابية وتفاعل

شمس النهار يقول...

فكرة جميلة

ياريت احنا نكتب افكار
وياريت نلاقي حد يقراها ويحاول ينفذها

تفتكر ممكن صوتنا وورقنا يوصل ويسمع

سلامي

رضا الكومى يقول...

السلام عليكم يا باشمهندس
أحب أحييك أولاً على حبك للبلد وتفكيرك الحضارى
بالنسبة للسلبيات فكلنا نتفق إنها كتير

أعتقد إن كلها بسبب البعد عن الدين

ولو اتكلمنا مثلاً عن مشكلة الرشوة
فما المانع من عمل دورات ( دينية ) كل فترة للموظفين
زيها زى أى دورة
اشمعنى فيه دورات كمبيوتر - ودورات للتدريب على الإدارة وغيرها
وبعدها أكيد الموظف سيكون عنده حصيلة من الأحاديث والآيات التى تتحدث عن العمل وحسن الخلق مما يجعله مؤهلاً للتعامل مع الناس

وكذلك فى بعض المصالح الإقلال من المكاتب
مثلاً فى المدارس ما حاجة ناظر المدرسة للمكتب
أليس من صلب عمله هو الإشراف والمتابعة يعنى عمله لا يحتاج للمكتب

وبرضه الاهتمام بالدين

وبالنسبة لتجميل الشوارع أليس من الأفضل زراعة أشجار النخيل التى تثمر بلحاً بدلاً من أشجار النخيل ( الأفرنجية )المزروعة لمجرد المنظر
على الأقل أهل كل بلد ممكن يحصل عندهم اكتفاء من انتاج البلح
ويبقى ساهمنا فى حل جزء من أزمة الغذاء

معلش أفكار غريبة شوية لكنى أعتقد إن ممكن يكون لها بعض التأثير

م/ محمد صالح يقول...

د / عرفة
شرفتى بزيارتك ويا ريت تكررها
وطبعا احنا محتاجين شوية تفاعل وايجابية
وانا كنت مستنيهم منك اولا

م/ محمد صالح يقول...

شمس النهار
اعتقد اننا بنعمل اللى علينا واكيد افكارنا هتلاقى اللى بيسمعها بس لازم نصبر شوية ونكون اقوى

م/ محمد صالح يقول...

رضا الكومى
شرفتنى ونورتنى وتأخرت كتير قوى
انت تعتبر اول تعليق كان نفسى فيه تعليق يحمل افكار افكار جميلة وتحترم
وخصوصا الجانب الدينى وفعلا لو كل واحد مننا تمسك بتعاليم دينه مشاكل كتير هتتحل
اما موضوع البلح هو كويس بس ممكن يكون غريب شوية
قصدى مش شرط اننا نزرعة فى الشوارع ممكن يتزرع فى مزارع واعتقد ان ده موجود

salsooooooola يقول...

يابشمهندس محمد
رأى حنين كويس قوى هنغير التعليم اللى هو أساس كل حاجة
بس هل انت فى إيديك تغير
لو فى ايديك تغير بقى يبقى مصر هتنتعش

هههههههههههههه

والحل عندى
بلاش الكتب اللى جاية من امريكا وارجع اسحبها تانى من المدارس

اجبارى فى دراسة التاريخ دراسة الحضارة الاسلامية التى أدت إلى الحضارة الغربية وازدهارها وتطورها
لأن قلبى بيوجعنى قوى لما بشوف أطفال ميعفروش مين الخوارزمى

وياريت بقى ننمى فى الأطفال دول حته الفخر بالأجداد ومحاولة تقليدهم
هنلاقى عندنا عباقرة كتييييييييييييير

asmaamosad يقول...

الموضوع حلو فعلا

بس يابشمهندس أنا بعمل دراسات عليا فى الاعلام وكان على أمل انى أشتغل دكتورة فى جامعة خاصة

فوجئت ان فى ناس تقديراتها أقل منى وبتشتغل وكل أما أقدم فى جامعة يقولوا دا تحصيل حاصل لأن معروف مين للمكان

أصلا كل الزملاء بيقولوا لازم تكون عارف حد فى مجال الاعلام دكتور كبير يعنى
وهو هيزكيك وتتعين فى الكلية

وتقولى مفيش محسوبية

ياريييييييييييييييييييييييييييييت

أميرة الأحلام يقول...

مش عارفه احنا لو قعدنا نتكلم عن مشاكل بلدنا هنلاقي مشاكل كتير جدا لا تعد
عندك التعليم والي بيحصل فيه
لو بصيت للمناهج الدراسيه ولا للدروس الخصوصيه وغيره كتير وقلنا يمكن المشكله تتحل لما يغيروا الوزير وبيتغير وبيحصل اسوء من الي قبله مشكله زى الدروس دى واستنزافها لدخل الاسره ممكن تتحل ازاى
لو كان المدرس الي بيدرس في المدرسه عنده ذمه وضمير في انه يشرح لتلاميذه كويس مش هيحتاجوا انهم ياخدو دروس لو الدوله زودت رواتب المدرسين بالقدر الي يخليهم يقدروا يعيشوا وما يضطروش انهم يدوا دروس او انهم يسافروا بره ويتهانوا علشان يقدروا يعيشوا
لو بصيت للمستشفيات والي بيحصل فيها والاهمال الي بيحصل فيها والاستهتار بحياه البشر
عارف احنا اهم حاجه عايزينها ايه علشان نحل مشاكلنا
اننا يكون عندنا ذمه وضمير اننا نراعى ربنا في الي بنعمله لو كل انسان خد باله من شغله كويس واداله حقه اكيد حاجات كتير هتتغير
مش هنلاقي الي بياخد رشوه ولا الي بيبيع ضميره
مش هنلاقي الفوضى والاستهتار الي احنا عايشين فيه
مش هنلاقي ناس معاها وبتطمع اكتر واكتر وناس مش لاقيه تاكل
يااااه حاجات كتير قوي المشكله اننا لانملك حل تلك المشاكل
"ان الله لا يغير ما بقوم حتى يغيروا ما بانفسهم " لو اتغيرنا وكل واحد في مجاله اشتغل صح وبالي يرضي ربنا اكيد مشاكل كتير هتتحل لكن طول ما كل واحد بيقول يعنى هى جت عليا انا هو انا الي هغير الكون هنفضل زى ما احنا وعمرنا ما هنتغير ابدا
يعنى موقف بسيط حصل قدامى
طبعا احنا مافيش اكتر من التلوث واكوام الزباله الي ماشاء الله موجوده في كل مكان
فكنت ماشيه انا وواحده صاحبتى ف الجامعه كان معايا كيس شيبسي فدورت على المكان الي المفروض ارميه فيه لقيتها بتقولي انتى بتدوري ليه ما ترميه على الارض
قولتلها انا ماتعودتش ارمى حاجه على الارض وبعدين ما ينفعش يابنتى علشان نحافظ على نضافه المكان قالتلي يعنى هى جت عليكى انتى
ده مثل بسيط
يعنى لو كل واحد فينا جه يعمل حاجه وقال كده عمرنا ماهنتغير
انا طولت اوى بس بصراحه الكلام في مشاكلنا ده مالوش نهايه
وشكلي هعلق تانى
استحملنى بقى

م/ محمد صالح يقول...

salsooooola
اولا ارحب بيكى فى اول زيارة للمدونة واشكرك على التفاعل مع الموضوع
واحب اقول اننا بإيدينا اشياء كثيرة جدا اولا بإيدينا التكم فى انفسنا تطوير افكارنا تحسين مستوى ثقافتنا ان نبحث دائما عن ما يجعلنا افضل ان نتخذ مواقف ايجابية ولا نكتفى بالمشاهدة السلبية
هذا كله من الممكن ان يفعل شئ
وانا اوافقك الرأى فى ان نربى فى ابنائنا الفخر بالاجداد والفخر بتراثنا المجيد ولاكن لا بد ان نعلمهم ايضا اننا لا يجب ان نعيش الحاضر وان نعمل على زيادة الامجاد لا ان نقف ونقول قد فعل اجدادنا كذا وكذا وان نفتخر بذلك وحسب بل علينا العمل لأن نكون افضل

م/ محمد صالح يقول...

asmaamosad
نورتينى فى اول زيارة ويا رب يدوم التواصل
انا مقولتش ابدا ان مفيش محسوبية او وسطه ومقدرش اقول ان فى مكان فى العالم خالى من هذا الامر
ولكن انا قولت اننا فى اتجاهنا لأن بنحسر هذا الامر بصورة كبيرة فى ظل توجهنا الى سوق العمل الحر
اما حالتك فهى للآسف تتكرر كثيرا ولكن اضن ان عليك جزء من المسؤلية فنحن عادة لا نحسن تسويق منتجاتنا
انا لى صديق حالتة كانت مشابه لحالتك وتخرج من الكلية ولكنه لم يتم تعينة بالكلية لأنهم اخذوا عدد محدد ولم يصلوا لترتيبة
ولكنه كان على علاقة جيدة جدا بكل الدكاترة الموجودة القسم مع انه من أثره بسيطة ولم يكن ذا نفوذ ولكنه كان متحسبا لحدوث امرا كهذا فهو اجتهد وذاكر ولكن ترتيبة لم يسعفة للتعين بالكلية وهذا لا ينفى تميزه ولكنه من خلال علاقتة بالدكاترة واقتناع احدهم به وبشدة من خلال اجتهاده الواضح اتاح له الفرصة بأحد الجامعات الخاصة ولكنى بصراحة انا ل اعلم هل الجامعات الخاصة ملتزمة بنفس المعايير فى تعين المعيدين التى تلتزم بها الجامعات الحكومية ام ل
ولكن الشاهد هنا ان زميلى هذا احسن تسويق بضاعتة بنى علقات جيده مع اساتذته ولأنه يستحق منحوه الفرصة
اتمنى منك ان تتمتعى بمزيد من الامل والقوة واسئل الله لكى التوفيق

م/ محمد صالح يقول...

اميرة الاحلام
حمد الله على السلامة يا بشمهندسة منورة والله
واحب اشكرك جدا على تعلقك واسمحسلى اقتنصة منه بعض الكلمات التى تمثل المفتاح الحقيقى من وجهة نظرى المتواضعة لحل كل مشاكلنا وهى......

""عارف احنا اهم حاجه عايزينها ايه علشان نحل مشاكلنا
اننا يكون عندنا ذمه وضمير اننا نراعى ربنا في الي بنعمله لو كل انسان خد باله من شغله كويس واداله حقه اكيد حاجات كتير هتتغير
مش هنلاقي الي بياخد رشوه ولا الي بيبيع ضميره
مش هنلاقي الفوضى والاستهتار الي احنا عايشين فيه
مش هنلاقي ناس معاها وبتطمع اكتر واكتر وناس مش لاقيه تاكل
يااااه حاجات كتير قوي المشكله اننا لانملك حل تلك المشاكل
"ان الله لا يغير ما بقوم حتى يغيروا ما بانفسهم " لو اتغيرنا وكل واحد في مجاله اشتغل صح وبالي يرضي ربنا اكيد مشاكل كتير هتتحل لكن طول ما كل واحد بيقول يعنى هى جت عليا انا هو انا الي هغير الكون هنفضل زى ما احنا وعمرنا ما هنتغير ابدا ""

فعلا هو ده الحل أبدأ بنفسك لازم كل واحد مننا يبدأ بنفسة اولا وصدقونى هنلاقى نفسنا فى مكانة تانية خالص

♥ شـــذا ♥ روحــــي ♥ يقول...

م. محمد

مساء الفل والياسمين بالمصري الجرىء

بالتاكيد فكرة رائعه جداااااااااا

ولكن مهما اتكلمنا ولا قلنا مشاكلنا هل من مستمع ؟ حتي لو حد سمع هل من حل ؟

اخي انا فعلا متسائمة

فاكتفي باني اقولك يسلم قلبك وربنا يقدرك

لك مني كل تقدير واحترام

farouksohair يقول...

فاروق بن النيل ....
الأفكار كثيرة ومهم أن تنفذ مش نقول كلام وبس هوه الحكومة بتقول خليهم يكلموا وإحنا نسمع ونطنش أهم فكرة فر رايي تبدأ من كل بيت " إن الله لايغير
مابقوم حتى يغيروا مابأنفسهم " صدق الله العظيم والقرآن هو أصدق الكتب السماوية ولذا يجب على كل بيت ورب أسرة أن يوجه أسرته إلى : "لخير والصدق والأمانة والشجاعة والمروءة والكرم والعفاف والكرامة والدين والإخلاص " وعندها فقط نكون قد بدأنا الطريق القويم المستقيم " كلكم راع وكلكم مسئول عن رعايته , الرجل فى بيته راع ومسئول عن رعيته ,والمرأة فى بيت زوجها راعية ومسئولة عن رعايتها, والخادم فى بيت سيده راع ومسئول عن رعايته , وكلكم راع ومسئول عن رعايته " صدق رسول الله صلى الله عليه وسلم . farouksam.blogspot.com

farouksohair يقول...

فاروق بن النيل ...
التغيير يبدأ من البيت وإلا لن يكون هناك تغيير لاالمظاهرات ولاالإحتجاج ولا المعارضة ولا الأحزاب السياسية تنفع البيت هو الأساس "ياأيها الذين آمنوا عليكم أنفسكم لايضركم من ضل إذا أهتديتم" سورةالمائدة"farouksam.blogspot.com

بنت النيل يقول...

الافكار كثيرة
وأيضا التحديات كثيرة
الافكار افكارنا احنا
والتحديات تحدياتنا احنا
وبرضه فى تحديات بتواجهنا